WALEMAVU WATAKIWA KUTUMIA FURSA WALIZONAZO NA SIO KUSUBIRI KUHURUMIWA NA WAHISANI.

Wito umetolewa kwa watu wenye ulemavu nchini kuyageuza matatizo yao kuwa fursa baadala ya kutegemea kuonewa huruma na wahisani hali inayowafanya kudharaulika.

Hayo yameelezwa hivi karibuni na Katibu wa chama cha wenye ulemavu mkoa wa Dodoma Justus Ng’wantalima alipotembelewa na gazeti hili ofisini kwake kwa lengo la kutaka kujua wamejipanga vipi kuhusiana na fursa ya ujio wa makao makuu.

Hata hivyo katibu huyo anasema kuwa mbali na kwamba wadau mbalimbali wanajitikeza kutoa fursa kwa watu wenye ulemavu ,hali bado si nzuri kwa jamii hii kutokana na baadhi yao kutokuwa na utayari wa kujitoa kufanya kazi .

Amesema,ujio wa makao makuu ni fursa kwao kwa kuwa  mahitaji yataongezeka na hivyo kuwataka watu wenye ulemavu kuchangamkia fursa huku wakimwomba Mwenyezi Mungu kuwapa nguvu ya kutokubali kukatishwa tama.

“Unajua,sisi sawa ni walemavu..Lakini naamini ulemavu haumaanishi kujibweteka.Unaweza kuwa mlemavu lakini kuna shughuli unazoweza kuzifanya zikakuingizia kipato na ukaisaidia familia,”anasema Ng’wantalima.

Mbali na hayo  anasisitiza kuwa Mwenyezi Mungu hakumuumba mlemavu ateseke na kujisikia mtumwa ambapo anatumia nafasi hii kuiomba jamii kutowanyanyapaa walemavu bali wawape maarifa pale inapobidi na kusema kuwa binadamu wote ni ndugu wanapaswa kuwa wamoja wakati wote.

Hatua hii inatokana na kwamba baadhi ya wanajamii  wanawadharau watu wenye ulemavu na kuona kuwa hawafai kwa chochote hali inayopelekea walemmavu kujiweka nyuma hata katika shughuli za kibiashara.

Wakati huo huo Wanachama wa chama hicho cha ulemavu wameiomba serikali kuzingatia ujenzi wa miundombinu na kusema kuwa iendane na mahitaji yao  ili kuwarahisishia wakati wa kutafuta huduma za kijamii.

“Mkoa wa Dodoma umepewa hadhi ya makao makuu na hivyo majengo yanayojengwa inapaswa yazingatie  watu wenye mahitaji maalumu ”,anasema mmoja wa walemavu .

Ili kujikwamua kiuchumi watu wenye ulemavu mkoani hapa hufanya shughuli mbalimbali kutokana na aina ya ulemavu ambapo wengine ni mafundi wa nguo,washona viatu,wapaka rangi nk.