DKT. BITEKO AZINDUA MATOKEO YA UTAFITI WA ATHARI ZA UPATIKANAJI WA NISHATI ENDELEVU TANZANIA BARA

Naibu Waziri Mkuu na Waziri wa Nishati, Dkt.Doto Biteko akizungumza
katika hafla ya uzinduzi wa matokeo ya utafiti wa athari za
upatikanaji wa Nishati Endelevu Tanzania Bara kwa mwaka 2021/2022
iliyofanyika jijini Dodoma.

Waziri wa Fedha, Dkt.Mwigulu Nchemba, akizungumza katika hafla ya
uzinduzi wa matokeo ya utafiti wa athari za upatikanaji wa Nishati
Endelevu Tanzania Bara kwa mwaka 2021/2022 iliyofanyika jijini Dodoma.

Na Mwandishi wetu Dodoma 

Naibu Waziri Mkuu na Waziri wa Nishati, Mhe. Dkt.Doto Biteko amezindua matokeo ya utafiti wa athari za upatikanaji wa Nishati Endelevu

Tanzania Bara kwa mwaka 2021/2022 ambao umeonesha kuwa asilimia 72 ya

kaya zote Tanzania Bara zinaishi katika vijiji/mitaa iliyofikiwa na

huduma ya umeme.

Dkt.Biteko amezindua utafiti huo jijini Dodoma tarehe 10 Novemba, 2023

katika hafla iliyohudhuriwa na Waziri wa Fedha, Dkt. Mwigulu Nchemba,

Mkuu wa Wilaya ya Dodoma, Jabir Shekimweri, Mwakilishi wa Katibu Mkuu

Wizara ya Nishati, Petro Lyatuu, Mtakwimu Mkuu wa Serikali, Dkt.

Albina Chuwa na Spika Mstaafu wa Bunge la Jamhuri ya Muungano wa

Tanzania, Anna Makinda ambaye ni Kamisaa wa Sensa.

Dkt. Biteko amesema kuwa, lengo kuu la utafiti huo lilikuwa ni kupima

upatikanaji wa nishati endelevu na athari ya upatikanaji wake kwa

Tanzania Bara. Aidha, utafiti ulikusanya taarifa za matumizi ya

nishati, kwa lengo la kuiwezesha Serikali kutathmini na kufuatilia

programu mbalimbali za maendeleo, kutunga sera, na pia kufanya maamuzi

sahihi ya mipango ya maendeleo kwa kutumia ushahidi wa takwimu.

“Utafiti huu umefanyika kwa mujibu wa Sheria ya Takwimu Sura 351

Ofisi ya Taifa ya Takwimu (NBS) kwa kushirikiana na Ofisi ya Takwimu

ya Norway (SSB), pamoja na wadau muhimu wa nishati ambao ni Wizara ya

Nishati, Shirika la Umeme Tanzania (TANESCO), Wakala wa Nishati

Vijijini (REA), na Mamlaka ya Udhibiti wa Huduma za Nishati na Maji

(EWURA) ambapo utafiti ulifanyika katika mikoa yote 26 ya Tanzania

Bara.” Amesema Dkt.Biteko

Amesema kuwa, kwa Tanzania Bara kufikia asilimia hiyo 72 ya kaya zote

zinazoishi katika vijiji/mitaa iliyofikiwa na huduma ya umeme,

Serikali imetimiza lengo namba 7 la Malengo ya Maendeleo Endelevu ya

Dunia (SDG 7) linaloelekeza kwamba "Kufikia mwaka 2030 kuwe na

uhakika wa upatikanaji wa huduma za nishati nafuu, za kuaminika, na za

kisasa kwa wote.

Katika hatua nyingine, Dkt. Biteko amesema kuwa, taarifa ya REA ya

mwezi Novemba 2023, inaonesha kuwa, jumla ya vijiji vilivyounganishwa

na umeme kwa upande wa Tanzania Bara ni 11,079 sawa na asilimia 90 ya

vijiji vyote (12,318), aidha Vijiji vilivyobaki (1,239) sawa na

asilimia 10 vinatarajiwa kuunganishwa na umeme ifikapo Juni 2024.

Ameongeza kuwa, Serikali imeanza kupeleka umeme katika vitongoji vyote

Tanzania Bara ambapo zoezi hilo limeanza mwaka 2023/24 kwa kupeleka

umeme katika vitongoji 15 katika kila jimbo.

Vilevile amesema kuwa, Serikali kupitia REA inatekeleza mradi wa

kusambaza mifumo ya kuzalisha umeme kwa kutumia nishati ya jua katika

makazi kwenye visiwa 41 vya Mikoa ya Kagera, Lindi, Mara, Mwanza na

Rukwa. Serikali pia kupitia REA inatoa uwezeshaji wa kiufundi na

kifedha kwa waendelezaji wa miradi midogo ya nishati jadidifu katika

maeneo ya vijijini ili kuimarisha upatikanaji wa nishati ya umeme

vijijini.

Kuhusu Nishati Safi ya Kupikia, Dkt.Biteko amesema kuwa Serikali

inakamilisha Mkakati wa Kitaifa wa Nishati Safi ya Kupikia unaojikita katika kutatua vikwazo vyote vinavyokwamisha matumizi ya

nishati safi ya kupikia na lengo ni kuhakikisha angalau asilimia 80 ya

Watanzania wanatumia nishati safi ya kupikia ifikapo mwaka 2033, ikiwa

ni hatua ya kuhakikisha matumizi ya nishati safi ya kupikia

yanaimarika nchini.

Aidha, amesema kuwa, Serikali imeendelea kuchukua hatua za kuhamasisha

matumizi ya LPG kwa kuwapatia wananchi mitungi ya gesi na vifaa vyake

ambapo katika mwaka 2023/24 Serikali kupitia REA imepanga kutoa kwa

wananchi mitungi 200,000 ya LPG na vifaa vyake pamoja na mifumo ya

kupikia ya gesi asilia katika taasisi mbalimbali za umma.

Pamoja na mafanikio hayo, Dkt.Biteko amesema kuwa, bado kuna changamoto ya kupatikana kwa nishati endelevu hivyo amewahakikishia

wananchi kuwa, Serikali inaendelea kuchukua hatua mbalimbali za muda

mfupi na za muda wa kati zitakazowezesha kufikia lengo la nishati safi kwa haraka zaidi.