TPHPA NA KEMI ZASAINI HATI YA MAKUBALIANO YA USHIRIKIANO ILI KUIMARISHA UDHIBITI WA VIUATILIFU NA USALAMA WA KEMIKALI NCHINI TANZANIA

Mkurugenzi Mkuu wa Mamlaka ya Afya ya Mimea na Viuatilifu Tanzania (TPHPA), Prof. Joseph Ndunguru, leo Aprili 11, 2025, amesaini hati ya makubaliano ya ushirikiano kati ya TPHPA na Mamlaka ya Usimamizi wa Kemikali ya Uswidi (KEMI) katika ukumbi wa mikutano wa Makao Makuu ya TPHPA, Arusha, Ngaramtoni. Hati hii ya makubaliano inatambulisha hatua mpya ya ushirikiano kati ya taasisi hizi mbili, ikiwa ni juhudi za kuimarisha sekta ya kilimo, usalama wa chakula, na kulinda afya ya binadamu na mazingira.

Ushirikiano huu utajikita katika maeneo matatu muhimu. Kwanza, utahusu udhibiti wa viuatilifu ili kulinda afya ya binadamu na mazingira. Aidha, taasisi hizi zitashirikiana katika kuendeleza na kutengeneza miongozo ya udhibiti wa viuatilifu, ili kuhakikisha kuwa viuatilifu vinavyotumika katika kilimo vina viwango vya ubora na usalama vinavyokubalika kimataifa. Pili, ushirikiano huu utahusisha kutathmini mifumo ya kimataifa ya utambuzi wa kemikali na vibandiko vya viuatilifu, ili kuboresha mifumo ya udhibiti katika nchi zote mbili. Hatua hizi zitasaidia kuboresha ubora wa viuatilifu na kuongeza usalama wa chakula duniani kote.

Prof. Ndunguru alieleza kuwa ushirikiano huu ni mwendelezo wa juhudi za awali za TPHPA na KEMI tangu mwaka 2018, ambapo TPHPA ilifaidika na mafunzo ya wataalamu kutoka Uswidi. Mafunzo haya yalihusisha maboresho ya mbinu za udhibiti wa viuatilifu, ikiwa ni pamoja na wataalamu wa TPHPA kwenda Uswidi kujengewa uwezo. “Tunayo furaha kuona ushirikiano huu ukiendelea na kuleta manufaa makubwa kwa sekta ya kilimo nchini Tanzania,” alisema Prof. Ndunguru.

Mamlaka ya Usimamizi wa Kemikali ya Uswidi (KEMI) ni shirika la serikali la Uswidi linalohusika na usimamizi wa kemikali, bidhaa za kemikali, na usalama wa kemikali katika mazingira ya kazi na asili. KEMI inahakikisha kuwa kemikali zinazotumika katika sekta mbalimbali, ikiwemo viuatilifu, zinazingatia viwango vya usalama na haziathiri mazingira au afya ya binadamu. Ushirikiano huu na TPHPA utaimarisha uwezo wa usimamizi wa kemikali nchini Tanzania na kulinda usalama wa chakula.

Kwa upande mwingine, kupitia ushirikiano huu, TPHPA na KEMI wanatarajia kuchangia katika maendeleo ya sekta ya kilimo nchini Tanzania, huku wakisisitiza umuhimu wa udhibiti madhubuti wa viuatilifu na kemikali zinazotumika katika kilimo. Ushirikiano huu utaleta faida kubwa kwa wakulima, wajasiriamali, na jamii kwa ujumla, kwa kuimarisha usalama wa chakula na kuhifadhi mazingira ya asili. Huu ni mchakato endelevu wa kuleta mabadiliko chanya katika sekta ya kilimo na kuhakikisha Tanzania inakuwa mfano bora wa udhibiti wa viuatilifu na kemikali.