JAMII YAHIMIZWA KUZINGATIA MATUMIZI SAHIHI YA DAWA.

Na.Elimu ya Afya kwa Umma.


Wananchi Mkoani Morogoro wamehimizwa kuzingatia matumizi sahihi ya dawa ili kuepuka usugu unaoweza kusababishwa na matumizi holela bila ushauri wa daktari.

Wito huo umetolewa Mkoani Morogoro na Mfamasia kutoka Manispaa ya Morogoro Adam Said wakati akitoa elimu ya Afya kuhusu matumizi sahihi ya dawa kwa waendesha bodaboda na bajaji(JUWATA) Manispaa ya Morogoro ikiwa ni katika utekelezaji wa kampeni ya kuelimisha umma iliyoratibiwa na Baraza la Famasi Tanzania kwa kushirikiana na Elimu ya Afya kwa Umma katika utoaji wa Elimu ya Afya.

"Tusiende kununua dawa bila kupima na ushauri wa daktari inaweza kutengeneza usugu wa dawa"amesema.

Kwa upande wake Mfamasia Mwandamizi kutoka Baraza la Famasi Tanzania Bi.Anna Temu amesema ni muhimu kufanyiwa uchunguzi kwanza kabla ya kujinunulia dawa huku akisisitizia kwenda kwenye maduka ya dawa yanayotambulika na Baraza la Famasi Tanzania.

"Unapokwenda kwenye duka la dawa hakikisha umefanyiwa uchunguzi kwanza kutoka kituo cha huduma za afya na pia hakikisha duka la dawa unaloenda kupata huduma liwe limesajiliwa na Baraza la Famasi "amesema.

Nao baadhi ya Wananchi Mkoani Morogoro wamesema elimu ya afya imewasaidia kwa kiwango kikubwa kuhusu matumizi sahihi ya dawa.

"Nashukuru kwa elimu niyoipata na nimetambua kuwa hatupaswi kujinunulia dawa bila vipimo na tusiende kwenye maduka yasiyotambulika,twende kwenye maduka yaliyosajiliwa na Baraza la Famasi"amesema Majaliwa John.