PROF. KITILA MKUMBO "WENYE BIMA YA AFYA NCHINI NI CHINI YA ASILIMIA 10

Waziri wa Nchi, Ofisi ya Rais, Mipango na Uwekezaji, Mhe. Prof. Kitila A. Mkumbo akizungumza na waandishi wa habari kuhusu mafanikio katika wizara yake ndani kipindi cha miaka 60 ya Jamhuri ya Muungano wa Tanzania leo Aprili 17, 2024 jijini Dodoma.

Na Okuly Julius , Dodoma

Waziri wa Nchi , Ofisi ya Rais, Mipango na Uwekezaji Prof. Kitila Mkumbo amesema watanzani wenye Bima ya Afya ni chini ya 10% ndio maana Serikali imekuja na mpango wa Bima ya Afya kwa wote ili kila Mtanzania awe na uhakika wa matibabu.

Kitila ameyasema hayo leo Aprili 17,2024 jijini Dodoma, wakati akizungumza na waandishi wa habari kuhusu mafanikio yaliyopatikana katika kipindi cha miaka 60 ya Muungano wa Tanzania.

Amesema Serikali hivi sasa inaendelea kufanya uchambuzi na utafiti kupata vyanzo ambavyo vitawezesha kugharamia bima ya afya kwa wananchi wasiojiweza.

"Ni kweli kabisa kuwa maendeleo yamekuwa kwa kasi sana ila bado watanzania wenye bima za afya ni wachache sana ni asilimia 8 tu sasa idadi iliyobaki hawana bima kwa haraka tunaweza kusema hawana uhakika wa matibabu hivyo ili kuwa na uhakika wa matibabu bunge limepitisha sheria ya Bima ya Afya kwa wote itakayomhakikishia kila mwananchi kupata bima ya afya," amesema Prof. Kitila

Kuhusu hali ya ukuaji wa uchumi Prof.Kitila amesema kwa miaka 20 mfululizo uchumi umekua ukikua kwa asilimia 6 hadi 7.

Prof. Kitila amesema licha ya kuyumba kwa ukuaji wa uchumi mwaka 2020 hadi 2021 hadi asilimia 1 mpaka 4 kwa sababu ya UVIKO 19 lakini kwa mapambano yanayoendelea hivi sasa ukuaji wa uchumi umefikia asilimia 5.2

Amesema pia kumekuwa na ongezeko la mtandao wa Barabara za zege na lami zinazounganisha mikoa kutoka kilomita 4179 mwaka 2000 hadi kufikia kilomita 11,966 mwaka 2022.