KISHINDO CHA KAMPENI ZA DKT. SAMIA KUTIKISA TANGA

Mgombea wa Urais wa Jamhuri ya Muungano wa Tanzania kupitia Chama Cha Mapinduzi CCM Dkt. Samia Suluhu Hassan leo Jumatatu Septemba 29, 2025, Mwezi Mmoja kamili kabla ya Uchaguzi Mkuu wa Jumatano ya Oktoba 29, 2025, anaanza Kampeni zake Mkoani Tanga akitokea Mkoa wa Pwani; akitarajiwa kuwa na Mikutano mitatu Pangani, Muheza na Tanga Mjini.

Akitokea Mkoani Pwani, Dkt. Samia pamoja na mambo mengine aliahidi kujenga uwanja mkubwa wa michezo Msoga Wilayani Chalinze, Kuongeza huduma za matibabu kwenye Hospitali ya Wilaya ya Chalinze ili kusogeza huduma zaidi kwa wananchi, pamoja na ujenzi wa miundombinu ya barabara na ukamilishaji wa miradi ya maji na umeme, akitoa hakikisho la usalama na utulivu hapo Oktoba 29, siku ya upigaji kura.

Katika Ilani anayoinadi Dkt. Samia kwa Wilaya ya Pangani wameahidi ujenzi na ukamilishaji wa Zahanati 7 za Mivumoni, Mikocheni, Boza, Mwembeni, Mbuyuni, Mikinguni na Mkwaja, Ujenzi wa Vituo 3 vya afya Kipumbwi, Mkwaja na Masaika, Ujenzi na Ukarabati wa Hospitali ha Wilaya, Ujenzi wa madaraja 10, kuendelea na ujenzi wa barabara ya Tanga- Pangani (Km50) pamoja na ufungaji wa taa 200.

Kwa Muheza Ilani anayoinadi Dkt. Samia imeahidi kando ya mengine uwekaji wa taa za barabarani 200 eneo la Tanganyikaz Bombani na Muheza, Ujenzi wa shule mpya 10, tano za msingi na tano za Sekondari, Ujenzi wa stendi kuu ya Mabasi Muheza, ujenzi wa madarasa 330 ya Msingi na Sekondari, Ujenzi wa maabara 20 za sekondari, pamoja na ujenzi wa miradi ya Maji kwenye Vijiji zaidi ya 30 pamoja na ahadi ya ujenzi wa miundombinu ya barabara za lami pamoja na za changarawe.

Kwa Wilaya ya Tanga, Ilani imeahidi kuelekea 2030 kujenga kituo cha afya Kirare, Ujenzi jengo la dharura hospitali ya Wilaya, ujenzi wa Zahanati za Machui, Mwarongo, Mpirani na Mapojoni, ujenzi wa gati maalumu lenye urefu wa Mita 300 litakalohudumia shehena za makasha, ujenzi wa gati ya kuhudumia shehena ha mafuta ya nishati (Petroleum) na ua kula (edible oil) eneo la Raskazone, Ujenzi wa gato maalumu ya kuhudumia abiria pamoja na jengo lake.

Wameahidi pia ufungaji wa taa 100 kwenye Jiji la Tanga, Ujenzi wa soko la Makorora kupitia mradi wa TACTIC, ujenzi wa fukwe ya Raskazone, ujenzi wa machinjio ya kisasa Pongwe, ujenzi wa hoteli ya nyota 5 Sahare Tanga, ujenzi wa masoko 2 eneo la Mgandini na Mlango wa chuma, Ujenzi wa bandari kavu Pongwe stesheni pamoja na ujenzi wa soko la kisasa la samaki Kasera, ujenzi wa chuo cha utumishi wa Umma Kange na mradi wa uboreshaji wa masoko na Fukwe.