MWANAUME AJINYONGA ARUSHA, KISA MGOGORO WA MAHARI

MWANAUME mmoja anayefahamika kwa jina la Cleofasi Forentin Oiso (35), mkazi wa Mtaa wa Olkung’, Kata ya Terati, Jiji la Arusha, amefariki dunia baada ya kujinyonga katika makazi yake, tukio linalodaiwa kuhusishwa na mgogoro wa kifamilia kati yake na mkewe.

Kwa mujibu wa taarifa zilizopatikana kutoka kwa majirani na watu wa karibu na familia hiyo, marehemu aliishi na mkewe kwa takribani miaka minane na walibarikiwa kupata watoto wawili.

Chanzo cha mgogoro huo kinatajwa kuwa ni suala la mahari, ambapo inadaiwa kuwa mke wa marehemu alifungasha nguo zake kuashiria nia ya kuondoka nyumbani hadi mahari itakapolipwa.

Hata hivyo, mke wa marehemu amekanusha vikali madai hayo, akieleza kuwa hakufungasha mizigo kwa lengo la kuvunja ndoa, bali alimkumbusha mumewe kuhusu ahadi ya kulipa mahari, suala ambalo, kwa maelezo yake, lilikuwa likijadiliwa mara kadhaa ndani ya familia bila kufikia makubaliano ya mwisho.

Majirani wa marehemu wamesema kuwa siku moja kabla ya tukio walizungumza naye na alionekana kuwa na huzuni, akieleza changamoto za kiuchumi zilizokuwa zikimkabili. Kwa mujibu wao, marehemu aliwahi kueleza kuwa angeweza kulipa mahari endapo hali yake ya kifedha ingekuwa nzuri, akionesha matumaini ya kuboresha maisha ya familia yake siku zijazo.
“Tulimwona akiwa na mawazo mengi.

Alizungumzia ugumu wa maisha na alisisitiza kuwa hakuwa na nia mbaya, ila hali ya uchumi haikuwa nzuri,” alisema mmoja wa majirani waliokataa kutajwa jina.

Tukio hilo limeibua huzuni na majonzi makubwa kwa familia, hususan mke na watoto wa marehemu, pamoja na wakazi wa eneo hilo, ambao wameeleza kushangazwa na kifo hicho wakimtaja marehemu kuwa mtu mwenye mahusiano mema na jamii.

Viongozi wa mtaa wamethibitisha kutokea kwa tukio hilo na kusema kuwa taarifa ziliwasilishwa kwa vyombo vya dola kwa ajili ya uchunguzi na hatua zaidi za kisheria. Aidha, wametoa wito kwa jamii kutafuta msaada wa ushauri nasaha na kutatua migogoro ya kifamilia kupitia mazungumzo na maridhiano.

Tukio hili linajiri wakati jamii ikiendelea kukumbushwa umuhimu wa kuzingatia afya ya akili, ustawi wa familia na mawasiliano yenye tija ndani ya ndoa, hususan katika nyakati za changamoto za kiuchumi, ili kuepusha madhara makubwa yanayoweza kujitokeza.