Na Okuly Julius, OKULY BLOG Dodoma
Serikali, kupitia Sheria ya Ununuzi wa Umma, inazitaka taasisi zote za umma kutenga asilimia 30 ya bajeti ya ununuzi kwa ajili ya makundi maalum, na hadi sasa zaidi ya trilioni 1 zimetengwa mahsusi kwa ajili ya tenda za makundi hayo.
Akizungumza wakati wa kongamano la ujumuishaji wa watu wenye ulemavu katika fursa za kiuchumi Novemba 29,2025 jijini Dodoma , Meneja wa Uhusiano na Mawasiliano wa PPRA, Remija Salvatory, amesema kiasi hicho cha fedha ni fursa kwa watu wenye ulemavu na makundi mengine, na kuwataka wajisajili katika mfumo wa NEST ili waweze kupata zabuni mbalimbali zinazotolewa.
Amesisitiza kuwa watu wenye ulemavu wana nafasi ya kipekee kwa kuwa wanaruhusiwa kuingia katika kila kundi la makundi maalum kulingana na sheria, hivyo wanapaswa kuchangamkia fursa hizo.
Remija amesema hatua hiyo ya kuhimiza ushiriki wa watu wenye ulemavu katika masuala ya kiuchumi imekuja wakati changamoto mbalimbali bado zinawakabili, ikiwemo Viziwi kukosa mawasiliano mazuri wanapopata huduma za msingi.
Awali, wakati wa ufunguzi wa kongamano la ujumuishaji wa watu wenye ulemavu katika fursa za kiuchumi, Afisa Ustawi wa Jamii kutoka Ofisi ya Waziri Mkuu, Sera, Bunge, Uratibu na Watu Wenye Ulemavu, Bruno Mwakibibi, ametoa wito kwa watendaji wa halmashauri kukusanya taarifa na takwimu za watu wenye ulemavu ili kuwaingiza katika mfumo wa utambuzi utakaowarahisishia upatikanaji wa huduma. Pia amesisitiza jamii kuendelea kuwaibua na kuwasajili watu wenye ulemavu, huku viongozi wa serikali za mitaa wakihimizwa kuwaingiza kikamilifu katika shughuli za ujenzi wa taifa.
Kwa upande wake, Mwenyekiti wa Shivyawata mkoa wa Dodoma, Mwl. Omary Lubuva, ameiomba serikali kutoa elimu zaidi kwa watu wenye ulemavu kuhusu fursa zinazowahusu, ikiwemo mikopo, ili kuondoa dhana ya kukatishwa tamaa kwa wale ambao hawajafanikiwa kupata mikopo licha ya kuomba katika halmashauri.
No comments:
Post a Comment