UJENZI WA BARABARA UENDE SAMBAMBA NA UWEKAJI WA TAA : ULEGA.

Waziri wa Ujenzi, Abdallah Ulega amemuelekeza Meneja wa TANROADS mkoa wa Kilimanjaro kuhakikisha anamsimamia Mkandarasi Kings Builder kukamilisha ujenzi wa madaraja saba ya dharura katika eneo la Kileo lililopo barabara kuu ya Himo Junction - Same ukamilike kulingana na muda wa mkataba uliopangwa.

Ameelekeza ujenzi huo uende sambamba na uwekaji wa taa za barabarani, njia za wananchi kuelekea kwenye makazi yao,
vituo vya mabasi na bodaboda pamoja na kuelekeza maji ya Mto Ng'ona kwenye njia yake.

Ulega ametoa maelekezo hayo leo tarehe 29 Novemba, 2025 wakati alipokuwa akikagua hatua zilizofikiwa za ujenzi wa mradi huo ambao umefikia asilimia 70 ya utekelezaji wake.

Ameeleza kuwa ni dhamira ya Mheshimiwa Rais Dkt. Samia Suluhu Hassan kuona wananchi wanafanya kazi usiku na mchana kwa lengo la kuijenga nchi yao hivyo ni muhimu eneo hilo kufungwa taakwa ajili ya biashara na usalama.

"Hakikisha unatafuta taa zisipungue 15 hadi 20 zifungwe katika eneo hili", amesisitiza Ulega.

Mkuu wa Mkoa wa Kilimanjaro Nurdin Babu ameeeleza kuwa tayari ofisi yake imefanya mazungumzo na TPC kwa ajili ya kupata mitambo ya kusaidia kuelekeza maji ya Mto Ng'ona katika njia yake na muda wowote kuanzia sasa wataanza zoezi hilo kabla ya mvua hazijaanza wakishirikina na Uongozi wa Kata hiyo pamoja na wazee wanaoufahamu asili ya mto huo.

Kwa upande wake, Meneja wa TANROADS mkoa wa Kilimanjaro Mhandisi Motta Kyando ameahidi mbele ya Waziri Ulega kushughulikia suala la taa za barabarani, kituo cha bodaboda, kituo cha basi katika eneo la Kileo na Hedaru Wilayani Same pamoja na njia za wapita kwa miguu kuelekea makazi ya watu.


Mbunge wa Jimbo la Vunjo, Mheshimiwa Enock Koola amemuomba Waziri Ulega kuitupia jicho ujenzi wa barabara ya Kilema Pofu - Mandaka ili iweze kukamilika kwa kiwango cha lami na hivyo kuchochea maendeleo ya Sekta ya utalii na uchumi wa Moshi.

Mradi huo wa dharura unahusisha ujenzi wa madaraja 7 na barabara za maungio zenye urefu wa mita 1,600 ambao unatekelezwa na Mkandarasi Kings Builders na kusimamiwa na Kitengo cha TECU kwa gharama ya Shilingi Bilioni 6.8 na unatarajiwa kukamilika mwezi Disemba, 2025.