Saturday, October 31, 2026

WAZIRI MAVUNDE ASHUHUDIA MKOPO WA BILIONI 50 KWA WACHIMBAJI WADOGO SONGWE

OKULY BLOG October 31, 2026 KITAIFA

NA MWANDISHI WETU - SONGWE.

Waziri wa Madini, Anthony Mavunde, ameshuhudia makabidhiano ya mkopo wa Shilingi bilioni 50 kutoka Benki ya CRDB kwenda kwa kikundi cha wachimbaji wadogo wa madini ya dhahabu cha Songwe Gold Family (SGF), kwa lengo la kuongeza mitaji, uzalishaji na tija katika shughuli za uchimbaji.

Akizungumza katika hafla hiyo, Mavunde amewataka wachimbaji kutumia mkopo huo kwa malengo yaliyokusudiwa ili kuongeza uzalishaji na kuchangia maendeleo ya kiuchumi. Amesema Serikali itaendelea kuwawezesha wachimbaji wadogo kupata mitaji, leseni na taarifa za kijiolojia zitakazowasaidia kufanya uchimbaji wenye tija.

Aidha, Waziri Mavunde amempongeza Rais wa Jamhuri ya Muungano wa Tanzania, Dkt. Samia Suluhu Hassan, kwa maelekezo ya kuwezesha maeneo yenye leseni zilizorejeshwa Serikalini kutolewa kwa wachimbaji wadogo, huku akisisitiza kuwa Serikali itaendelea kuchukua hatua dhidi ya leseni zisizoendelezwa ili kutoa fursa kwa vikundi vyenye nia ya kufanya shughuli za uchimbaji.

Katika hatua nyingine, Mavunde amekabidhi leseni za uchimbaji mdogo wa dhahabu kwa vikundi 81 kupitia Mradi wa Mining for a Brighter Tomorrow (MBT), unaolenga kuwawezesha vijana, wanawake na watu wenye ulemavu kushiriki katika mnyororo wa thamani wa madini.

Kwa upande wake, Mkurugenzi wa Matawi na Wateja Wadogo na Wakati Tanzania kutoka CRDB Bonventure Poul amesema benki hiyo itaendelea kushirikiana na Wizara ya Madini kuwawezesha wachimbaji wadogo, wachakataji na wafanyabiashara wa madini kupata mitaji. Ameeleza kuwa kati ya mikopo ya kiasi cha Shilingi bilioni 426 iliyotolewa na benki hiyo, Shilingi bilioni 150 zimeelekezwa kwa wachimbaji wadogo.

Naye, Mkuu wa Mkoa wa Songwe, Alhaji Abubakar Kunenge, amesema Serikali itaendelea kuunga mkono wachimbaji wadogo kwa kutambua mchango wao katika kukuza uchumi wa mkoa na Taifa.

Kwa upande wake, Mkuu wa Wilaya ya Songwe, Dickson Nickson ameitaja changamoto ya umeme kuwa kikwazo kwa wachimbaji na kuiomba Serikali kuharakisha upatikanaji wa nishati hiyo katika maeneo ya uchimbaji.

Naye, Mbunge wa Jimbo la Songwe, Philip Mlugo, ameipongeza Serikali kwa kuwawezesha wachimbaji wadogo na kuzitaka benki nyingine kuiga mfano wa CRDB katika utoaji wa mikopo kwa sekta hiyo.