DHANA YA MBOLEA KUHARIBU UDONGO NI POTOFU-DKT. DIALLO

Mkuu wa Mkoa wa Geita Mhe. Martin Shigella (katikati) akizungumza katika kikao kazi cha pamoja na Bodi ya Wakurugenzi wa Mamlaka ya Udhibiti wa Mbolea Tanzania (TFRA) na wadau wa kilimo kilicholenga kujadili mikakati ya usambazaji wa mbolea katika msimu wa 2023/2023. Aliyekaa kulia kwake ni Mwenyekiti wa Bodi ya Wakurugenzi wa TFRA Dkt. Anthony Diallo.

Wajumbe wa Bodi ya Wakurugenzi wa TFRA wa pili kutoka kushoto Patrick Mwalunenge na wa tatu Mha. Juma Mdeke wakimsikiliza kwa makini Mkuu wa Mkoa wa Geita Mhe. Martine Shigella ( hayupo pichani ) wakati wa kikao kazi cha kujadili mikakati ya usambazaji wa mbolea katika msimu wa 2023/2024.

Washiriki wa kikao kazi cha Pamoja cha Mkuu wa Mkoa wa Geita Martin Shigella na Bodi ya Wakurugenzi ya TFRA wakifuatilia mjadala wa masuala mbalimbali ya maendeleo ya kilimo ikiwemo mikakati ya usambazaji wa mbolea ya ruzuku katika msimu wa 2023/2024.

Mwenyekiri wa Bodi ya Wakurugenzi ya Mamlaka ya Udhibiti wa Mbolea Tanzania Dkt. Anthony Diallo amesema kuwa dhana iliyojengeka kwa watu wengi kuwa mbolea hususan za viwandani zinaharibu udongo ni potofu.

Dkt Diallo ameyasema hayo jana katika kikao kazi kati ya Mkuu wa Mkoa wa Geita Martin Shigella na watendaji wake, Bodi ya Wakurugenzi wa TFRA, vyama Vikuu vya Ushirika na wataalamu wa kilimo mkoani humo. 

Dkt. Diallo amesema kuwa utumiaji wa mbolea za viwandani kwa usahihi unaongeza uzalishaji na tija shambani na wala sio kuchakaza ardhi na hivyo kumsaidia mkulima kujikwamua kiuchumi. 

Mwenyekiti huyo aliongeza kuwa watu wengi wasiotaka kutumia mbolea husingizia kuwa mbolea inaharibu udongo hivyo Mamlaka itaendelea kutoa elimu kuhusu matumizi sahihi ya mbolea nchini na amewataka wakulima kuondokana na dhana hiyo potofu.

Akizungumza awali, Mkuu wa Mkoa wa Geita Martin Shigella amesema tayari Mkoa wake umeshafanya maandalizi ya msimu wa kilimo kwa mwaka 2023/2024 na amemshukuru Rais Samia kutoa tena ruzuku kwa wakulima.

Mhe.Shigella amesema kuwa mkoa wake tayari umewahamasisha wakulima kununua mbolea mapema na kuainisha maghala katika kila kata yatakayotumika kuhifadhia mbolea hizo na hivyo ameitaka TFRA kuyaelekeza makampuni kufikisha pembejeo hiyo muhimu kwa wakati.

Lengo ya ziara ya Bodi ya Wakurugenzi wa TFRA katika Kanda ya Ziwa ni kujitambulisha kwa wadau na kusikiliza changamoto zinazowakabili ili kutoa ufumbuzi na kuelezea mikakati ya serikali ya usambazaji wa mbolea katika msimu wa kilimo 2023/2024.