Waziri wa Katiba na Sheria, Dkt. Juma Zuberi Homera amesema Serikali imeweka mkazo mkubwa katika kuimarisha sekta ya sheria ili iwe kichocheo cha maendeleo ya uchumi na kuhakikisha upatikanaji wa haki kwa wananchi wote.
Akiwasilisha hotuba ya bajeti ya mwaka 2026/2027 bungeni, Waziri Homera alieleza kuwa hakuna maendeleo ya kweli yanayoweza kupatikana bila uwepo wa mfumo imara wa kisheria unaolinda haki, mali na uwekezaji.
Amesema Serikali imejipanga kuboresha mazingira ya utoaji haki kwa kuimarisha taasisi za kisheria, kuongeza ufanisi wa mahakama na kuhakikisha mashauri yanashughulikiwa kwa wakati ili kupunguza ucheleweshaji.
Aidha, amebainisha kuwa matumizi ya Teknolojia ya Habari na Mawasiliano (TEHAMA) yataongezwa ili kurahisisha utoaji wa huduma za kisheria, kuongeza uwazi na kupunguza urasimu katika mfumo wa haki.
Waziri Homera amesisitiza kuwa pamoja na maboresho hayo, Serikali itaendelea kuimarisha mifumo mbadala ya utatuzi wa migogoro ili kupunguza mzigo mahakamani na kuwapatia wananchi suluhisho la haraka na nafuu.
Katika hatua nyingine, alisema huduma za msaada wa kisheria zitaongezwa kwa wananchi wasio na uwezo ili kuhakikisha hakuna anayekosa haki kutokana na hali ya kipato.
Ameongeza kuwa Serikali pia itaendelea kulinda haki za binadamu na kuimarisha ushirikiano wa kimataifa katika masuala ya sheria ili kuhakikisha Tanzania inabaki kuwa mfano bora wa utawala wa sheria.
Waziri Homera amesema kuwa bajeti hiyo si tu mpango wa matumizi ya fedha, bali ni nyenzo muhimu ya kujenga Taifa lenye utawala bora, uchumi imara na maendeleo endelevu.
No comments:
Post a Comment