Tuesday, May 19, 2026

BAJETI YA ULINZI 2026/2027 YALENGA KUIMARISHA USALAMA WA TAIFA

OKULY BLOG May 19, 2026 HABARI

Na Okuly Julius, OKULY BLOG, DODOMA

WAZIRI wa Ulinzi na Jeshi la Kujenga Taifa, Dkt. Rhimo Nyansaho, leo Mei 19, 2026 amewasilisha bungeni bajeti ya Wizara hiyo kwa mwaka wa fedha 2026/2027, akieleza mikakati ya Serikali ya kuendelea kuimarisha uwezo wa ulinzi, usalama na maendeleo ya taasisi za kijeshi nchini.

Akiwasilisha hotuba hiyo jijini Dodoma, Dkt. Nyansaho amesema Serikali itaendelea kuliimarisha Jeshi la Ulinzi la Wananchi wa Tanzania (JWTZ) kwa kulipatia zana na vifaa vya kisasa vya kijeshi, mifumo ya mawasiliano ya kiteknolojia pamoja na kuendeleza rasilimali watu ili kuongeza ufanisi katika utekelezaji wa majukumu ya kulinda Taifa.

Amesema katika mwaka wa fedha 2026/2027, Serikali itaweka mkazo katika kuboresha mazingira ya kazi kwa wanajeshi kupitia utoaji wa huduma bora za afya, makazi, mafunzo, mazoezi pamoja na matunzo ya vifaa na zana za kijeshi.

Aidha, Waziri huyo amesema Serikali itaendelea kuimarisha Jeshi la Kujenga Taifa (JKT) kwa kuboresha miundombinu yake ili kuwezesha vijana wengi zaidi kupata mafunzo ya awali ya kijeshi sambamba na stadi mbalimbali za kazi kwa ajili ya maendeleo ya Taifa.

Katika hatua nyingine, amesema Wizara imepanga kuendelea kuimarisha Jeshi la Akiba pamoja na kulinda na kuendeleza miradi ya kimkakati yenye maslahi mapana kwa Taifa.

Hotuba hiyo pia imebainisha mpango wa kuimarisha mashirika na taasisi za utafiti wa masuala ya kijeshi pamoja na kuanzisha viwanda vipya vya ulinzi vitakavyozalisha bidhaa kwa matumizi ya kijeshi na kiraia.

Dkt. Nyansaho amesema Serikali itaendelea kushirikiana na sekta binafsi katika kuanzisha viwanda hivyo kwa lengo la kuongeza uzalishaji, kukuza uchumi na kutengeneza ajira kwa wananchi.

Katika eneo la ushirikiano wa kimataifa, amesema Tanzania itaendelea kuimarisha ushirikiano wake na United Nations, African Union, Southern African Development Community pamoja na East African Community katika masuala ya ulinzi na usalama wa kikanda.

Pia amesema Wizara itaendelea kushirikiana na mamlaka za kiraia katika kukabiliana na majanga na dharura mbalimbali pale inapohitajika, ikiwa ni sehemu ya mchango wa Jeshi kwa jamii na Taifa kwa ujumla.