Wajumbe wa Mkutano wa Baraza la Michezo la Taifa na Viongozi wa Vyama vya Michezo wakisikiliza hoja mbalimbali kuhusu sekta ya michezo kwenye mkutano unaofanyika katika Ukumbi wa Benjamin Mkapa, Jijini Dar es Salaam Machi 13, 2026.
Katika mkutano huo, wajumbe wanajadili kwa kina namna ya kuimarisha usimamizi wa vyama vya michezo pamoja na kuweka mikakati madhubuti ya kukuza vipaji vya wanamichezo kuanzia ngazi ya chini hadi ya kitaifa. Pia mjadala umejikita katika kuboresha mifumo ya mashindano ili kuongeza ushindani na ubora wa michezo nchini.
Aidha, viongozi wa vyama mbalimbali wamewasilisha changamoto wanazokutana nazo katika utekelezaji wa majukumu yao, ikiwemo uhaba wa rasilimali, miundombinu ya michezo pamoja na uhitaji wa mafunzo kwa makocha na waamuzi ili kuongeza ufanisi katika sekta hiyo.
Katika hatua nyingine, mkutano huo unajadili namna ya kuimarisha ushirikiano kati ya serikali, sekta binafsi na wadau mbalimbali wa michezo ili kuongeza uwekezaji katika michezo na kuibua fursa zaidi za ajira kwa vijana kupitia sekta hiyo.
Vilevile, wajumbe wameeleza umuhimu wa kuweka mikakati ya kudumu ya kuendeleza michezo mashuleni na vyuoni, hatua ambayo inaelezwa kuwa ni msingi muhimu wa kuibua vipaji vipya vitakavyoiwakilisha nchi katika mashindano ya kimataifa.
Mkutano huo unatarajiwa kutoa mapendekezo na maazimio mbalimbali yatakayosaidia kuimarisha maendeleo ya sekta ya michezo nchini na kuweka mwelekeo mpya wa usimamizi wa vyama vya michezo.
Waziri wa Habari, Utamaduni, Sanaa na Michezo Mhe. Paul Makonda anatarajiwa kufunga mkutano huo baadaye leo.
No comments:
Post a Comment